Ingredientes (para 4 persoas)

• 360 g de arroz bomba
• 50 g da parte branca do porro
• 2 tomates naturais picados
• Tinta de lura (se che resulta difícil atopala fresca, podes usar 2 bolsas de tinta conxelada)
• Un chorro de coñac
• 2 salmonetes cortados en supremas
• Maionesa e un dente de allo negro
• Aceite, sal e 1 litro de caldo de peixe (podes aproveitar as cabezas e espiñas dos salmonetes)

Elaboración

1. Salteamos o porro cun pouco de sal nunha pota baixa, engadimos o arroz e o tomate picado sen pel e deixamos cociñar un anaco para "abrir a flor" do arroz, é dicir, que o gran comece a absorber o aceite, cambie de cor a cristalino e empece a incharse lixeiramente.
2. Seguimos salteando e flameamos co coñac.
3. Engadimos o dobre de caldo e, cando ferva, incorporamos a tinta de lura. Remexemos cunha espátula ata que o arroz quede totalmente negro.
4. Mentres se cociña o arroz, facemos á prancha os lombos de salmonete, colocando primeiro a parte da pel cara abaixo na prancha ou tixola.
5. No vaso da batedora, mesturamos os dentes de allo negro cun pouco de maionesa e batemos ata obter un "alioli exprés" de cor escura, similar ó regaliz.
6. Unha vez listo o arroz, servímolo cun lombo de salmonete coa pel cara arriba e decoramos co alioli negro.