• A Fundación Dieta Atlántica da USC publica un volume no que se recollen os alicerces conceptuais e científicos deste modelo de alimentación saudable e sustentable, que posúe unha das pegadas de carbono máis baixas de Europa
• O libro consta de 18 capítulos, desenvolvidos en 270 páxinas, elaborados por autores internacionais que analizan a historia e características da Dieta Atlántica e conta coa colaboración e asesoramento científico da Sociedade Española de Obesidade e a colaboración da empresa de distribución alimentaria Vegalsa-Eroski

A Dieta Atlántica comprende un conxunto de hábitos alimentarios e estilo de vida que une os territorios de Galicia e o Norte de Portugal e cuxas claves se basean no abundante consumo de peixes, lácteos e produtos de frescos, técnicas culinarias sinxelas e a mellor forma de conxuntar unha comida pracenteira en compañía de familia e amigos. Así se recolle no libro Basees Científicas da Dieta Atlántica, promovido e dirixido pola Fundación Dieta Atlántica da USC, coa colaboración de Vegalsa-Eroski e Sociedade Española de Obesidade (SEO-SEEDO).

A obra foi presentada hoxe polo padroado da Fundación Dieta Atlántica, coa presenza do reitor da USC, Antonio López, e recolle nas súas 270 páxinas os alicerces conceptuais e científicos da Dieta Atlántica a través de 18 capítulos elaborados por autores internacionais.

Ademais de establecer as bases deste modelo alimentario, o libro define o concepto “Dieta Atlántica” non só para a comunidade científica senón tamén para nutricionistas, produtores e distribución. “Posiblemente a Dieta Atlántica se poida aplicar a outras rexións de España, Portugal e Europa, como un modelo de alimentación saudable e tamén sustentable desde o punto de vista ambiental, xa que posúe unha das pegadas de carbono máis baixas de Europa”, explicou  Felipe F. Casanueva, vicepresidente da Fundación Dieta Atlántica, tamén presente no acto. . Na presentación participou, así mesmo, o secretario xeral para o Deporte de la Xunta de Galicia, José Ramón Lete; o vicepresidente da Sociedad Española de Obesidad (SEO-SEEDO), Diego Bellido e  a directora RSE, Comunicación e Área Cliente de Vegalsa-Eroski, Gabriela González.
 
Familia e vida saudable, eixes do estilo Atlántico
O libro articúlase en 18 capítulos, asinados cada un por un ou varios expertos, que aborda distintos aspectos da Dieta Atlántica. Así, analízanse temas tan diversos como a promoción deste tipo de alimentación nunha comunidade mediante a intervención das familias, a actividade física como compoñente esencial ou o papel da dieta atlántica na prevención da obesidade.
 
Así mesmo, no libro abórdanse tamén as características da dieta da poboación galega, concluíndo que manifesta aspectos positivos como o alto consumo de vexetais, hortalizas e legumes, aínda que se advirte de que este consumo tende a descender entre os máis novos.
Outro aspecto relevante que se inclúe nos estudos recollidos no libro Bases Científicas da Dieta Atlántica son os beneficios que deste modelo de alimentación para a saúde. Concretamente incídese no feito de que o consumo dalgúns destes alimentos contribúe á prevención do cancro e o envellecemento, factor este último que explicaría que Galicia conte cunha das poboacións máis lonxevas do mundo. Nesta liña, a doutora Ana Belén Crujeiras cualifica a Dieta Atlántica como unha posible “dieta epixenética”, cuxos compostos poden inducir efectos beneficiosos para a saúde por medio de mecanismos que regulan o funcionamento dos xenes e que poden actuar na prevención de enfermidades.
 
Como ‘medir’ a Dieta Atlántica
No volume inclúese ademais un capítulo chamado “cara a un score da Dieta Atlántica”, elaborado por un extenso grupo de traballo que colabora coa Fundación Dieta Atlántica e coordinado por Felipe F. Casanueva, no que se establece un índice de Dieta Atlántica que sexa operativo e se poida usar de forma habitual.
Os traballos de redacción e edición do libro Bases Científicas da Dieta Atlántica foron coordinados por Felipe F. Casanueva, que contou co asesoramento dun comité científico integrado pola xefa do grupo de epixenómica e nutrición do IDIS-CHUS, Ana Belén Crujeiras; o vicepresidente da SEEDO-SEO, Diego Bellido; a profesora do Instituto Politécnico de Viana do Castelo, Manuela Vaz-Velho e a pediatra Rosaura Leis, integrante do padroado da Fundación Dieta Atlántica e coordinadora da unidade de gastroenteroloxía, hepatoloxía e nutrición pediátrica do IDIS-CHUS.