Segundo os Estatutos, a Fundación ten por obxecto fomentar o estudo, a investigación e a difusión da Dieta Atlántica para a saúde e o benestar da poboación. Dentro deste obxecto, o padroado terá plena liberdade para determinar as actividades da Fundación, establecendo obxectivos concretos que, ao seu xuízo, sexan os máis axeitados ou convenientes en cada momento. Son fins específicos:

• A realización de estudos e proxectos de investigación de carácter multisectorial sobre a Dieta Atlántica, abarcando ámbitos como a alimentación, a nutrición, a saúde, a hostalaría, a gastronomía, a agricultura, a gandaría, a pesca, a acuicultura, a enoloxía, entre outros.
• O estudo da influencia recíproca do descubrimento de América nos hábitos alimentarios das dúas marxes do océano Atlántico.
• A investigación de mercados e comportamentos de consumo.
• A mellora da calidade nutricional e organoléptica dos alimentos da Dieta Atlántica.
• Estudos de impacto.
• Seguridade alimentaria e trazabilidade.
• Restauración e turismo gastronómico.
• O asesoramento a todo tipo de administracións, empresas e institucións educativas, así como a transferencia de tecnoloxía na materia.
• A certificación de produtos da Dieta Atlántica.
• A realización de actividades culturais, científicas ou doutra índole relacionadas co obxecto da Fundación.
• A proposta e organización de estudos sobre a Dieta Atlántica.
• O establecemento dun observatorio para o seguimento da Dieta Atlántica.
• A difusión da Dieta Atlántica.
• A publicación de traballos relacionados coa temática da Fundación.
• O desenvolvemento de programas e accións que se consideren convenientes para o mellor cumprimento dos fins fundacionais.